Salungano, Salungano

Munwe munna wa Ha-Matshisevhe o vha e goswi la mafhelelo. Fhedzi ene o vha e muthu wa mashudu na vhutali. Linwe duvha ha pfala uri huna ndau yo laho kholomo ya musanda. Ha lidzwa tsimbi musanda, vhanna vhothe vha laedzwa uri vha ye u toda ndau iyo. Uyo munna a tshuwa nga maanda a thoma u tetemela sa lutanga lu madini. Vhathu vha tshi mu vhudzisa uri ndi ngani a tshitetemela a amba uri u khou tetemedzwa nga mbiti.

Munna uyo a ya hayani. A vhudza musadzi wawe uri ndi kale a tshi zwi vhona uri Vhamusanda vha a mu vhenga. “Zwino vha khou toda u mbulahisa nga ndau. Ndi a shavha zwino ndi shavhela Ha-Madzhie”, ndi munna a tshi vhudza musadzi wawe.

Munna o mbo di bva u ya u toda mbongola yawe uri a shavhe ngayo. A swika a wana ila ndau yo laho kholomo yo dzula fhasi ha muri yo fura. Fhedzi ene nga dzone nyofho a sa zwi vhone uri ndi ndau. A vhona u nga ndi mbongola yawe. A vhofha ndau nga thambo. A i rwa uri a takuwe i dzhene lwendoni. Fhedzi ndau ya balelwa u takuwa nga hone u furesa. A sia o i vhofhelela na muri o divhudza uri u do vhuya nga la matshelo.

Nga duvha li tevhelaho a tshi swika fhala he a vhona u nga o sia mbongola yawe hone, a wana ndau yo sema mano. U vhona zwo ralo a mbo di gidimela musanda a vhidza vhathu uri vha de vha vhone kula kudau kwe ene a ku vhofhelela na muri. Vhathu vha tshi swika vha i vhulaha, vha fhedza vho mu hwalela ntha vha tshi khou mu fhululedza.

Linwe duvha ha da ndou ye ya la mavhele masimuni. Ha vhidzwa vhanna uri vha ye u i toda. Munna wa goswi a shavha nga mbongola yawe. A tangana na ila ndou ndilani. Nga u tshuwa a fhufha kha mbongola a gonya muri. Musi e ntha ha muri a dovha hafhu u tetemela sa lutanga lu madini. U tetemela hawe ha ita uri a wise tshiputu tshawe tsha tshigume. Ndou ya la tshigume, ya zwimbelwa, ya fa. Munna a tsa kha muri a gidimela musanda. A swika ngei a vhudza vhathu uri vha de vha vhone kula kudou kwe ene a ku vhulaha. Nangoho vhathu vha tshi swika vha wana ndou yo fa.

Linwe duvha ha vha na mmbi yo fhataho tsini na Ha-Matshisevhe yo diimiselahu u thuba mudi uyo. Ha vhidzwa vhanna uri vha ye u thasela mmbi iyo. Munna wa goswi a mbo di ri vhusiku sala nduni a tshi ri u a shavha. Musi e mushavhoni a vusa ndau dze dza vha dzo digeda. Nga u tshuwa ndau dza shavha. Dzi tshi swika phanda dza wana ala maswina o tshe o edela. Ndau dza vha vhulaha vhothe. Munna wa goswi a humela murahu o livha musanda. A swika hanengei a vhudza vhathu uri vha de vha vhone zwila zwiswina zwe ene a zwi vhulaha. Vhathu vha mangala nga maanda vha tshi vhona vhuhali hawe.

Ha mbo di vha u fa ha lungano.