Mashango na Zwirendo Zwao

Ndi vhana vha Nyaremelani;
Ni remele Vhembe miratho;
Vhahulu vha sa kande madi;
Vhamusanda ndi philiphili;
A i lengi u pidimuwa.

Musanda a huyi vhatete;
Hu ya vhadenya sa khuni;
Hu iwa nga dzimbilingwane;
Vha vunda mafhali nga thoho.
Ndi ya ya vho ndi yo vhona vho;
Ndi do vhona khovhele yanu;
Khovhele ya vharwa Thovhele;
Vha tshi la vha ala mikumba;
Vha shavhisa mmbwa u doba.

U farese thavha Siphuma;
Vhalidzi vha ngoma ndi manzhi.

Ni songo ri ni tshi ya Makonde;
Na wana thanzwa na muna;
Na muna no muna thevhele;
Makonde la Ravhura ha bvuma;
Hu bvuma hu sala phathoni.

Dzimauli a hu diei;
Ndi fhethu mahoshohoshoni;
Mpata wa Ramadzivhisa;
Wo dzivhisa khanga u pala.

Pile lanu la Nyatshibwanana;
Tshibwanana tsho fura samu;
Tsho vhombela khulu dza luma.

Ndi luthihi na Mukumbani;
Luaname lwa Vho-Thugwane;
Ha-Tshivhasa midi ya vhathu;
Yavho ya sala dzula.

Phandamashango Mutshindudi;
Wo fhanda Gole na Tshivhase.

Tshitaka tsha Gole ndi dzunde;
Ndi dzunde la Nyamutshenuwa;
Musadzi o tshenuwa demba;
O tshenuwa demba u lila;
A fhima uri ndi tshigidi;
Tsha kunda Gole ho zwikuwa.

Kale havho vha tshe mmembe;
Vha tshi runga muthu nga pfumo.
Lambani ndi nyamalise.

Vhalovhedzi na Vhahananwa;
Mitupo vha ila lutanga;
Vha ila buka la madini.

Luongori lwa Vho-Madadzhe;
Madadzhe ndi Vho-Ratshitaka;
Tshi no pfi tsho remwa mbalelo;
Matshelo tshi do remwa khwivho.

Tshikashule tsha Vho-Manenzhe;
Tshi sa dali nga mvula u na;
Tshi dala nga mavhilivhili.

Phopha madi ndi Manenzhe;
Manenzhe murema na vhana;
Ni vhone nga swiswi la mvula.

Thanga ntswu ya magwadi;
Ndi Manenzhe murema na vhana;
Tshivhala o vhea Nethanda;
Manenzhe muri wa bonze;
Muina wo dzhena tshivhanda.
Mukuyu ndi la Nekalange;
Kalange la mula nga Niya;
O guma nga musetshe Vhembe.

Khalaru yo tiba Ha-Luvhimbi;
Yo tiba Nethengwe a tuwa.

Vhatshinyali vha a seana;
Nethengwe o sea Luvhimbi;
A tshi sea gumbu la mvula.

Thavha khulu dzi a rendana;
Luvhola yo renda Luonde;
Thavha khulu Madzivhańombe.

Tshirundu phande tsho fhalala;
Mpumbulu wo mela Vari;
Vari ha Nthabalala.

Matangwa ndi mutshinya shango;
Phunguhwe yo lila Muledzhi;
La Ha-Madala li a fhalala.

Mamburu vulani ndila;
Hu a dzhena tshihu Ranwedzi;
Ene ndi Nyamudalotsha;
Thama khulu ya Mundalamo, ya Mukhada mulila-vhathu;
Mukhada ndi Nyatshiemula;
Tshiemula midi ya vhathu.

Vha Tshakhuma vho tswa mutupo;
Vha ana nga Dombo Tshakhuma;
Tshakhuma tsha Madzivhandila;
Tsha Mabodo a Vho-Rudani.

Mangwele mavhuya u ratha;
A sa naki mudi u fhata.

Mangwele kwa lukula vhula;
Vhula hashu ha dala nanyi;
Tshikwingwi kwa Sambembula;
Tshidindi ndi tsha vhakololo.

Malindini lo vha lo naka;
Mambwane Netshidaulu;
Mapate la Nyamutshokota;
Matangari vho tamba ngakwo;
Vho nea Muvenda nyofho.

U rambe li tswuke Nyamande
U gume ha makhulu Thengwe;
Vhuduna vhu sa li madoni;
U vhuye na vhusahasaha.

Matangari na vha Tshiombo;
Vho lwela mutanzwa u muna;
Vho lwela mudo wa vhasadzi.

Mavunde la Nyatsitsanwana;
Tsisa nwana ri gonye thavha.

Mutama ndele a ye a Mavunde;
Huna Ifani wa Maguvhu;
Li a swa li a sananga.

Vha Mianzwi a vha luvhi khosi;
Vha luvha tivha Maneledzi;
Maneledzi maandatshena;
Midzimu ya vha Ha-Luvhimbi;
Vhumbedzi ndi hunakaho.

Mathina ro da vho Muledzhi.

Vha Muhuyu ndi mahodoga;
Ndi manyani malamavhele;
Muhuyu wa gundapfene;
U liwa thole nga vhafhiri.

Muhuyu la Vho-Ramugoma;
Magoma a lila ha Thovhela.

Mulima ndi mulondavhathu.

Li a fhisa duvha Niani;
Vhukalanga li otsha nama;
Malungudzi li vhea khali.

Ha-Tshihanane vha nga Vhaniya;
Tshihanane vho vha vho dzula;
Vha bika nnda masimuni;
Vha tshi vhuya vha hwala phetho.

Ha Ratshivhunu tsha mudziili;
Tsha vhańwe tsho vha na ludzula.

Rambuda ha koni u tama;
Arali a tame Nyabele;
Wa Silidi Sinyamphatha;
Masia a lire ha fheli.

Thandavhalu ya Manavhela;
La Lwamondo ndi la Maboho;
Makambe la Nyakhuhutsali;
Khuhutsali thi imbi mutsho;
Mutsho u imbwa nga nduna.

Mauluma la Ramutuka
La Ravele Matsheketsheke.

Vilimadi la Vho-Mavhunga
Tshimbupfe ndi la Nesengani;
Vari ndi la Nthabalala;
Nngwekhulu la Vho-Madzhiga;
Tshitomboni tsha Mbubana;
Phalaborwa la Magegere (Malatji).

Nyadzani ndi thephamadungo;
Mutanzwo wa thaha dza vhana;
Musheu wa Magiledzhi.

Nzhelele ndi la Vhaniya;
Muvhuyu a u meli Dzata;
Nzhelele Mutangaumani.

Ndoutshubwa dzo nwa Nzhelele;
Dza mananga dzo nwa Muungadi.

Tshandama tsha Mapangadundu;
Lukau lwa Vho-Nyamalamba;
Phalama ndi la Sigari;
Mulodi la Nyapwanyeledza.

Tshiavha tsha Mukondeleli;
Vhasadzi vha kondelela mivhango.

Tshifhire i amba mafhungo;
Songozwi yo ro tanganedza;
Songozwi thavha ya Dzanani;
Ya Mphephu Tshilamulela.

Tshifhireni tsha Vho-Dzhabuli;
Tsha ranngu yo hwala tanzu;
Yo isa Tshitavha-mmbeni;
Tshitavha-mmbeni tsha Vuvha.

Tshiwani tsha mulala bai;
Thenzheni la malowa ndila;
Vho lowa mufhiri wa gondo;
Vha salaho vha fe sa khuhu.

Ndo lora Tshimbupfe tsho diwa.
Vha Tshimbupfe vho via muthu;
Tsha vuwa tshi tshi duba mutsi.

Tshirundu na Nemapakoni;
Vho lwela mufula u doba;
Vha tshi lwela mufula wa vhana;
Mufula wo fhandula mbwane;
Vha tshi lukwa u songo dobiwa.

Tshitanini lo vha lo dzulwa;
Ha-Mutele lo vha lo dzulwa;
Tshithuthuni vhu lila ngoma;
Vhu sa lili ngoma matangwa;
Ndi madedza a Vhakalanga.

Ndo dinusa nga namana tshena;
Namana yo bvaho mananga;
Mananga la Rakulungwane.

Vha Ramasunzi kuvhanganani;
Ni yo la mutumbu tsenene;
Tshivhula tsha matshokotike;
Tsha gumbu lo fhela nga mipfa.

Vhulorwa hu vhuvhili, hu vhuraru;
Hunwe ndi ha Mathantshane;
Hunwe ndi ha Mahandulula;
Mahandulula wa Phawe;
Vhusendeka vhu redza thavha.

Vhufuli la Mphigalale;
Vhufuli ho laulwa lusu;
Lu no pfi lwa mapfundo mana.

Duthuni la muri wa dzunga;
U no dzunga u sina dumbu;
Dumbu lawo ndi vhakololo;
Ndi vho Phophi na vho Tshidino.

Tshisahulu tsha Makumbane;
Tshisahulu vha luvha nndu;
Vha luvha i no pfi Mutenda;
Bororo la minango mina;
Wa vhutanu u sera khomba;
Sinngwele nndu ya Satha;
Vhulimu a vhu weli ńwana.

Tshipetane tsha Vhulagulu;
Tsha magwai vha a dutuwa;
Ndi khombe ya Ńwatshiula;
Wa Nyadenga u engedzedza;
Vhadzimu vha mu fha zwo ralo.

Mandiwana ndi khovhe ya vhimbi;
I no enda i tshi tshewa na shango;
I tshewa i tshi ya Nzhelele;
Nzhelele li lila mavhoda.

Tshitungulu tsha Nyandalumwa;
Nda lumwa nga nowa mulenzhe;
Vuluvulu la luma tshanda.